Panak Boru Sabou

jan   14.59   cerita simalungun   Comment  

       Jaman safari, bani sasada huta dong nadomma marumah tangga marniombah dua halak. Sadama ai dalahi margoran Tariluh, sada naboru margoran Sabou. Damei do pargoluhanni keluarga ni sidea panorang ai.Bani namandalhon jorja, sapangembei do sidea marlahoan. Niombah mangurupi orangtua, orangtuape harga (sayang) dong hubani niombahni.Lang piga dokah halani parnaboritan, marujung goluhma bapa bani keluargani sidea. Tadingma inang namabalu pabagal-baggalhon dua niombahni. Tapi lang homa piga dokah, mittor marujungma homa inang ai halani naboritan. Tadingma Tariluh pakon botouni Si Sabou, janah iparnagodang amborunima sidea han huta nalegan.Ari lopus ari, lambin marbaggalma Tariluh pakon Sabou. Tariluh jadi garama na tampan/ganteng tumang, sonai homa Sabou jadi anak boru najenges. Janah bani sada tiiki ari, marbual-bualima sidea namarbotou.“Botouhu Sabou, domma marbaggal hita pakon amboru. Nuan panorannima hita mangurupi amboruta nadomma pagodanghon hita,” nini Tariluh.“Anggo ahu lahomalah hu parlajangan massari. Anggo domma dong holi bohalhu hubaenma ai mangurupi amboru,’ nini Tariluh use.“Anggo misir ham Bang, isema hasomanhu?. Tongondo ham holi mulak?,” nini Sabou gobir halani holongni namarbotou.“Mulak do ahu botouhu. Jagama amboruta urupihoma bani pakkorjaan,” nini Tariluh.

       Lang piga dokah sidea marbuali, sautma tongon misir marlajang hu huta nadaoh laho massari horja.Bani panadingni Tariluh, Sabou na hinan bani pakkhorjanan narajin mulai surut samangatni. Age tikki horja, rado Sabou marangan-angan mamikiri pargoluhanni botouni Si Tariluh i parlajangan.Hamagouan tumangdo Sabou bani misir marlajang botouni. Tapi halani tonahni Tariluh namakkatahon mulak do holi hu huta, Sabou pe bani tonggoni marpangindoan jadi jolma nasuksesma botouni i parlajangan, janah boi dapotan bohal nabahat ase boi mulak hu huta.Ari marlopus bulan, lopusma homa hatahunan langdong dapotan tonah atappe kabar Si Sabou humbani botouni. Pusokan uhurma ia, halani siholni hubani botouni Si Tariluh. Gatima ia tangis halani siholan tumang.Hape i parlajangan, Si Tariluh na hinan marjanji marhoja dear-dear ase dapotan bohal lang sittong jenges-jenger marhorja. I Parlajangan, passarian na idapotni, boisdo ijudihon pakon marpoya-poya.Halani pargoluhanni namarpoya-poya pakon marjudi, gokma use parutanganni i parlajanganni. Hassipe domma bahat utangni, ihorjaon Tariluh dope homa namarjudi. Bani pikkiranni, anggo monang marjudi boima ia mulah huhuta pakon manggalar utang-utangni. Hape, lang hamonangan nadapotni. Tapi lambin roh bahatnima use utangni.

      Sada panorang, halani utang langbe tartanggulagi. Piga-piga parutangannipe langbe porsaya hubani Si Tariluh. Bahkan, sidea manakkap Tariluh janah ipasungma homa ia i huta ai parlajanganni.Mulak use hubani pasal Si Sabou. Halani siholni hubani botouni Si Tariluh, mulaima ia daram-daram janah misirma ia han huta mandarami botouni. Janah homa, tarbogeini do homa otik kabar soal parlahouni botouni Si Tariluh.Mardalan nahei han huta nasada, huhuta nalegan manlopusi piga-piga harangan tapi lape dong ijuppahni Si Tariluh. Janah mulaima marhoru ia, bani pandaramanni. Tikki mulai marhoru pakon holsohan tapi irandu holongni marbotou, bani pardalanan pajuppah ma Si Sabou pakon sada orangtua nadomma toras janah boima atahonon oppung.“Mase songon naholsohan ho boru. Huidah songon nalungun tumang uhurmu. Aha nabou hu urupi,” nini oppung ai manisei Si Sabou.“Aimada pung. Dokahma ahu i pardalanan mandarami botouhu. Goranni Tariluh, ongga doham mambogei goran ai, atap pajuppah,” nini Sabou mambalosi sukkkun-sukkunni oppung ai nakonai.“Lang ongga ahu pajuppah. Tapi goran ai ongga do tarbogei ahu. Tarsardo i huta on ai, aima namaposo narakkah marjudi pakon marpoya-poya. Halani ai bahat utangni, janah nuan tarbogei itakkap parhutado ia halani marutang lalap,” nini oppung ai.Mambogei hatorangani oppung ai, tarsonggotma Si Sabou, janah huridapma iluhni manektek.“Aido hape tene pung. Ibotohhamdo ija iananni itakkap botou hai pung. Siholan tumang ahu hubani, harapdo uhurhu pajuppah,” nini Sabou sambil hosakan (tangis langkaluar sorani).“Lang hubotoh ija ianan pastini. Tapi tonahku, ase pajuppah hanima. Takkihma hayu nabaggal janah ganjang,  hanjaima maho martaur mandilo botou mai. Atap adong namanangar, boi padashon hubani botou mai,” nini oppung ai misir mandadikhon Sabou.

    Dobhossi misir oppung ai, iturushon Sabouma mardalan homa. Sambil mardalan, itonggorima homa atap dong hayu naganjang. Janah dobhosi dapotni hayu naganjang, mittor itakkihni ma mandihuthon tonahni oppung naijuppahni ai.Das hossi bani ujungni hayu ai, mulaima martaur-taur Si Sabou. Manaurhon goranni botouni Si Tariluh.“Ooooo…botou….botou…botouhu Tariluh,” nini Sabou mamukkah taurni.“Ida daohma pardalanan….tene botouhu…..mandarami ham i parlajangan,” nini Sabou use irik tartangis, halani siholni hubani Si Tariluh.“Oooo….ale….ale…….Botou…….uu….O…ale…ale parhuta…..ijado nani botou ai…:” marulak-ulah Sabou martaur-taur irik tartangis.Piga-piga dokah martaur, langdong namambalosi janah roh lungunnima uhurni Si Sabou. Bani lungunan uhur sambil tangis Si Sabou, itaurhonni ma use nasongon dilo-dilouni hubani parhuta pakon botouni Si Tariluh.“O…ooo ale oppung….oppung namarkuaaaaa……sa. Urupiham ma niombahmu na lungun mandarami botouhu,” “Urupiham….homa niombahmu on, ase boi makkhurangi holsohni botouhu,” nini bani taur-taurni songon namandoding.“O…ooo oppung ni habayakon…..berehamma hubaku habayakon ase boi mangurupi botouhu……hu……u.” “Ganupdo hubaen…huondoshon goluhku bani botouhu…..uuuu,” tikki manaurhon on mulaima golap ari, janah rohma homa udan pakon logou nadoras.

     Panorang sonaima dorasni udan pakon logou, lang ipardulihon Si Sabou. Torusdo ia i atas ni hayu sambil martaur. Janah taur-taurni naparpudi “Ganupan akkulaku humbani simanjujung pakon pagorini…huberedo hubani nasiam lo….ooo parhuta..asalma lunas utangni Tariluh,,,,hhh,,,,botouhu…..hu..” nini Sabou sambil tangis sambil iparanggang haduasi tanganni.Janah ijin salosei taurni Sabou, irikma homa roh dorasnni longgur, marsora mittor toppongma homa salih jadi songon hayu. Bonani hayu ai, ibukkus songon jambulan pambukussni, janah dong homa tupangni.Sapari, hayu aima na ianggap songon salih-salihanni Si Sabou. Tupang aima tanganni si Sabou nini halak sapari, sonai homa pambukkusni aima jambulanni na ganjang hinan. Iatahon halak safarima goranni hayu ai bagot.Iatahon bagot, halani tikki tupangni hayu ai itagil, kaluarma songon bah na daini manis matobu-tobu. Bah ai, iatahon halak safari salihanni iluhni Si Sabou, natorus itangishon halani siholan tumang hubani botouni Si Tariluh.Anggo ipajojor hita humani taur-taurni Si Sabou namakkatahon haganupajn akkula ni ipakei asalma boi manggalari utangni botouni. Aima, jambulan aima aribur naboi ipakei manjadi tutupni tayup rumah atap sopou.Tanganni marbuah aima naiatahon kolang-kaling sondahan on, janah iluhni aima jadi bagot na boi inum janah boi ibaen jadi gula merah. Akkkula nasongon pamatangni bagot ai, anggo domma toras ianan ni hidu marasar, hidu ai boi ipangan janah mattindo homa daini.

        Artini, haganupan nadong bani hayu bagot dongdo haporluanni haganupan. Bahkan, anggo bani namaragat (manyadap) bagot, naboron tikki  mambalbal sambil martaur-taurdo si paragat ase songon namarbah nini tanganni bagot ai.